Yesu la Nikodemo
Alola Yoane 3 : 1-21
Bofalise omodi, dina inandi Nikodemo, oki ontononene ndatei andasi Yuda ; andoyakaki ele Yesu lotsho, aolouwulayandi, Labi, isho yeyaka mbo, Woyadi wekyi oyakaki mele Nkumu Ndjei, lolokonda lakonto ondeya ikela nimbikelawe nkina Nkumu Ndjei apoyadi landi Ko Yesu aolambayandi, Sosolo, sosolo, nshokosangelayemi, Nkinonto opotshwendoto andapokusi yilama nda wapemelona Nkumu Ndjei. Nikodemo apepaki, lanonduwulaki mbo, mayadi onto engambe, andaokeya yotshwa sheleko ? Andaokeya yuta ndikundju ina nyango la yita yotshwa ? Ko Yesu onduteyaki djoi ayandi, Sosolo, sosolo, nshokosangelayemi, nkinonto opotshwe lashi la ele Nyuma andapokusi yena wapemelona Nkumu Ndjei. Ombotshwelounu ole nkounu ; ombotshwele Nyuma ole nyuma. Ko andaoluta yosangelayandi, toshashimwaki nda djoi ikosangelemi mbo, diyadi dinyo yotshwendoto ; epelele ipupaka mpenelangeko, la we yokaka oposo ondeko, ayi wopeyi wudi oyakeko la wopeyi wudi okendeko ; onto lontondotshwele Nyuma oyadi nko shiko. Ndetambesoko Nikodemo onduwulaki Yesu ayandi, baoi ane baokokelama sheleko ? Yesu onduteyaki djoi ayandi, wondoyadi wekyi ondasi Yuda ko wopopokwaoi ane ? Sosolo, sosolo, emi nshokosangelayemi, Ishisangakaoi aiko andeyisho dishisambedyakaoi anenisho, ko inyopambodyaoi aiko atepedisho. Nkina inyopambodyaoi ana motshi ane alosangelemi, sheleko ekambodyinyo asangalomemi aoi anda loola ? Landaolosangelayandi, Lakonto aolulela nda loola pe nkoiko ondokitela ma loola, BononOnto, andiko ayadi nda loola. La sheki Mose wuledyaka ndjwa ndoshwe, diyadi lOnonOnto yuledyama nko shiko inonto lonto onimedya, ate lomo londa diiyo. «Lolakona Nkumu Ndjei alekolaki yokasi motshi olango andokaaki Ononandi ikinda mbo, Onto lonto onimedya atopitanaki ayi ate lomo londa diiyo» Yoane 3:16.
Osi Yuda one, Nikodemo aki Bofalise o la wekyi ondaoi ana Nkumu Ndjei ndatei andasi Yuda ; shene andoki bolaki onanto ankina. Nkulandoki ontononene ndatei anankina, ando mele aolelengana lonoi ndotemonandi onda yotshumya mboka. Andi menge okendaki nda widima ko andoyakaki ele Nkumu Yesu ndiyasa aoi anda iyani inda lomo. Akiandi wokakosakonda Yesu andaoyala la mposenda yokaoi anandi, mbo, mangandayadi laoi anda iyani mele Nkumu Ndjei. Ko Nikodemo okendaki ele Yesu lotsho. Djoi ine iyadi shena nimba. Widimokiako ndotemonontone ; ndotemonandi oki widimonda tshuu. Afalise pala baokanedya mbo, Isho toyadi diyani, ayi Nikodemo aoleya mbo, ndjadi nda widima, sheko ekiandi ayakakele Yesu. Yesu aolamba loshadu, aolimedya ipulula landi la yotshumya mbokenda lomo.
Nikodemo aolangola isangela Nkumu Yesu ayandi, Isho yeyaka mbo, Wende wekyi mele Nkumu Ndjei la isho ipepaka ndaoi aiko akelawe ndatei ananto. Ko Yesu aolutola djoi ayandi, Ontopotshwe madiko apokusi diyala nda wapemelona Ndjambi. Nkumu Yesu atoki nko wekyi mele Ndjambi ; andaki Ndjambi menge. Sheko andi atolanga yulama lontoiko la yikya landi ikokodi indaoi aki Afalise atepelaka. Nkumu Yesu oyakaki na motshi diyosangelanto aoi anda sosolo ana Ndjambi sheko andosangelaki Nikodemo ditshinindaoi aiko. Wolanga ishashala laoi anda lomo ? Wolanga yilama nda wapemelona Nkumu Ndjei la yeya insoi itshwakolandi auto anandi ? Ko diyadi la we yuta yotshwa mele Ndjambi menge. Nikodemo aokanedya djoi inda yotshwa nda djongi ; ayi Nkumu Yesu osangaki djoi inda yotshwendoto. Ontedimba yuta yetama ndikundju ina nyango la yita yotshwa iyaninditshila, andapongoyala la lomo ondoto ; aokota nko la lomoiko ondelengelengi oki elandi ndoso. Yesu osangelaki Nikodemo ayandi, Osotshwelounu ole nkounu. Nkinishangema iyotshwele nyango endishangema, ikikoyala onkoko nkina nta, eleko ? Lako ; ikikoyala ishangema. Ko topongeya iyalasi wapemelona Ndjambi nkina tombotshwiyotshinounu ontulu. Telengana diyotshindoto ; iyotshi madiko, mele Nkumu Ndjei. Alolaka Yoane 1:12,13. «Ayi andokaakaiko anambaki mpipo enda iyalanana Ndjambi, baiko baolimedya dina inandi. Iyatotshwe mulungu nkina nda olangonounu, nkina ndolangononto, ayi mele Ndjambi». Ishangemidimba yetama ndikundju ina nyango yetamenkamesato, iko ikuta yotshwa pe nkishangema. Yotshwendoto eyadi djoi ishambontokidi mele. Yuta yotshwa shene eyadi na mpambena NyumendOlotshi. Aya Yesu mbo, Lashi o la Nyuma. Ashi ayadi nimbendaui ana Nkumu Ndjei. Nkina wombokaoi aiko ndotemondawe, apa aoi aiko antulu, ko nkino Nyuma mele aokamba lako ndotemondawe, wokuta yotshwa ; wokotswaendoto ; wokotshwa madiko la wokeya yilama nda wapemelo one ondoto onda loola, djoi inda osounontulu apokusi diyala nkoko. Osounu aokoshashala yilamotshwako ndetetenyi epa laoi anounu ? Lakemba ! Ko pe nkaiko baolotshwendoto baokeya diyalasi wapemelo oiko.
Rédigé en langue Ikela par J. Barnes (Kitoko).
LWEMBO 3
Lwembo londa Davidi aki bononandi
Abasaloma akimanaka landi
1. Ndjadiako, bantonyi banami baophula;
Banto eusa baoludwa inda yuna lami boshela;
2. Banto eusa baosanga djoi inda lomo lonami mbo;
Andaphongaya yika mele Nkumu Ndjei; Sela. (*)
3. Ko we, Ndjadiako, womonyinga o shena nguwa;
Woyadi ditombya dinami, woluledya botshonami.
4. Ndokoonda Ndjadiako, la lolaka lonami,
Landi aokonduteya djoi ma bokoto bonandi bondekila. Sela.
5. Emi ndoletama, ko ndolaya ilo;
Ndoletshwa lolokona Ndjadiako ayadi dinsukaka.
6. Nkula belomba benenene benanto baonsamanya,
Inda dinkelelombe, mpongoka bophodu.
7. Etshwaka we Ndjadiako, ondikyaki we Ndjambi enami;
Djoi inda wombokphula bantonyi anami nda itama;
Wobulaki baino bandakedi banembe.
8. Yika eyadi mele Ndjadiako;
Botshwalondawe bole elanto andawe. Sela.
(*) Dikadimola inda djoi ine «Sela», mbo ; «Shilama phele ; kanedyaka mpima». Ayawe ; Ulamaka wee, okanedye baoi banc Ndjambi.
Lwembo lone loyadi ashimba mele. Isho yeyaka sheki Abasaloma, bonona nkumu Davidi wengesanelaka ishe, aolanga diphonola bokitshwa melandi. Ko Davidi lanto anandi baoluta ndekoto. Akiandi mpiko andi okotaki lwembo lone ele Nkumu Ndjei, Ndjambi enandi. (Alolaka nda 2 Samwele 15-18) Santo phala andjelaki Abasaloma, ko diyaki la Davidi yuna la banto baiko boshela. Aye andi atophela Ndjadiako, Ndjambi enandi. Nkumu Davidi aolekama nkelandi betsho beuma. Ko djoi inandi indososo iyadi dina ina Ndjambi enandi, mbo ; Ndjadiako. Dina ine ditekyaka mbo ; Andi akiako, andi alako, andi aokoyala elengi ndi diiyo. Davidi ondosangelaki mbo ; Ndjambi enami, we yenaka mbo ; Bantonyi banami baondekola phala ; nkela nde sheleko ? Iyo baolemala inda yuna lemi boshela ; baosanga ayiyo ; Ndjambi aphongootana. Davidi mbo ; Sela ; ayawe ; «Shilama phele ; nkanedyaki djoi ine». Ayadi sosolo mbo ; Ndjadiako mele aphongotana bononandi ? Bophoto ! Nkina ndjadi bona bonandi, andi aphongontona, aphongontshika nkula wina bophoko. Ko Davidi aolophwa dikotomedya ina Ndjambi la losaseka lonandi. Nkina andayadi Isoke inami, andaphongondokya nsonyi ndosonda bantonyi banami ; aokondikya. Davidi aolophwa sheki Nkumu Ndjei nguwa enandi ndetsho eki Saulu wokindjaka elu ; andi aolimedya mbo ; Andaokuta indikya mele bantonyi ankinane.
Nkumu Ndjei ayaki ditombya dinandi. Abasaloma olangaki diphita ditombya inda ishe landi o mele diyala nkumu endasi Isalele ; aye ditombya diko inda Davidi ditoki ditombya inda Davidi o mele ; Ndjadiako ayaki ditombya dinandi, ko Abasaloma atoki la mpamba enda yoimola ma djowa ine. Aki Nkumu Ndjei wokosaka nsadi enda esonelo enandi, andi okambaki la mpamba enandi inda ditomanya bonkambi onandi nkoko.
Ko Davidi okotaki ayandi ; «Ndjadiako aokonduteya djoi ma bokoto bonandi bonda ekila» (v.4). Djoi iki Abasaloma akelaka iki djoi inombe, apha djoi indolotshi. Ko Nkumu Ndjei yesanyaka ekila enandi mele. Andi aphimedye bakedi bandaoi banembe diphita ekila enandi. Sheko, aki Abasaloma atonaka Davidi, andi otonaki o la Ndjambi enda Davidi. Ayadi olotshi isho yophwa djoi ine. Bantonyi bayadi ditotonaka djoi inda toyadi basi Kilisto YOTONAKA O LANDI MELE ; landi aokotesanya la mpamba enandi enda diiyo.
Davidi aki ndatei andoshela ; andi atoki ndatei andola, aye andaki ndoshwe bona mpampa, lako letetenyi endolotshi enda yishamelo ; aye andi okotaki ayandi ; «Ndoletama ko ndolaya ilo». Andi aolutsha olotshi akiandi wophwaka mpamba enda Wesanyi bonandi, Nkumu enda bya. Ayandi ; Nkula belomba bendiyo baonsamanya inda dinkelelombe, mpongoka bophodu. Nkina woyadi la bophadi bolekola bantonyi andawe mpamba, wophosambi diwa lophodu. Nkinandi dilangaka we diwa, wokowa ; ko nkinandi dilangaka we ditshikala la lomo inda yokambela bolemo, bantonyi andawe bauma baphoyadi la mpamba enda dikokelela djoi iphoko. Bolotshi ondiso yophwaka mpamba enandi la wina la wina.
Ko nkumu Davidi aolotsha Ndjadiako mbo ; Etshwaka, ondikyi we Ndjambi enami. Davidi yoetaka mbo ; Ndjambi ENAMI ; apha phe nko Ndjambi. Ndjambi osonaki Davidi, aye Davidi osonaki Ndjambi ando mele. Nkuwuli isoke ; Ndjambi ene ale Ndjambi endawe mele ? Nkina woyadi isosoke inandi, andi ayadi Botomanyi bondawe.
Davidi osangaki mbo ; Ndjadiako enami okphulaki bantonyi banami nda ditama. Djoi ine iyadi shena nshawo. Davidi aolena bantonyi anandi shena nyama inda ishangema, nga nkoi. Nkina wokphula nkoi nda itama, nkina wobula baino bandiko, ikiphongeya dikodiaka. Shene Ndjambi okphulaki bantonyi bana nkumu Davidi, aolimola mpambendiyo enda yokelelombe.
La nkuma, Davidi aolemba lwembo londa boshadu ayandi ; Yika ene eyadi mele Ndjadiako. Lako one ; Davidi olekolaki bantonyi mpamba la wanya bonandi mele ; aye Ndjadiako ondalekolaki la mpamba ENANDI, landi aolikya bonkambi bonandi. Ko Davidi aolemba lwembo lonandi lone londoshadu mbo; Botshwalo bondawe ole ele banto bandawe. Sela. Okanedye djoi ine isoke. Nkina tole lotshwalo, tole loko phe nko melandi. Basi motshi ine yeyaka phe nko ditolamba wambo; Nkumu endiso yeyaka ditotshwakola insonyi inda sosolo lindotshwako.
Rédigé en Langue Ikela, par J. Barnes (Kitoko)
MAKO 9:1-29
Nempudi ene isho tombalola inda diphaningwa ina Nkumu Yesu. Ko diyadi dsho yophwa mbo; Ndesuka enda Tshapita 8 andi osangelaki baeki banandi djoi inda bewedi onandi (v.31). Isho yeyaka mbo; Baeki bayaki la Yesu lolango londa sosolo, la iyo batolanga yena elu enandi ekiandi wasangelaka. Petero olangaki yosuka, ko Nkumu Yesu ondophaphwangaki mbo; Lekaka mokongo onami, Satana. Andi olangaki disuka Nkumu lolimo bonandi bokiandi akambelaka Apha. Ko nempudi ene isho yenaka mbo; Elu eki Nkumu Yesu akindaka lako esuka enda djoi. Ndoso bonandi ayadi ditombya ndatei ananto bya ana ndjei. Ko nda v.1 andi aosangela baeki baiko mbo; Bamodi bandiyo bayadi yemalakane baphongowa elengi ndi anenalomiyo waphemelo bona Nkumu Ndjei boyoyi la mpamba. Iyo baokanedya ayiyo; Nkumu endiso aokoyala Nkumu endasi Yuda lakelengi, landi aokokima basi Romo la baphaya ankina ma motshi indiso. Aye, aki betsho botoa alekaka Nkumu okolaki baeki basato, Petero la Yakoba la Yoani, landi okendaki, aolunda diyo ndadiko anda bokoto bondotali. Mpiko Nkumu Yesu ophaningwaki ndosondiyo la iyo basato baolena ditombya dinandi diko dikiandi wasangelaka ndoso. Iyaolena mbo; Nkula Nkumu Yesu aotonama na motshi, nkulanto baokoodjaka nda kuruse, mokongo andi aoketshwalomi mewedi, aokophikamalomi nda ditombya ina Nkumu Ndjei. Nkumu Yesu olangaki iyo yeka yekelo ene endiko. Nkumu endiso aki Bonto, sosolo, akiandi na motshi; ko, andi aokotshikala Bonto botshwako. Aye, akiandi ane, baolosoka; nda ditombya mpiko baokoophika. Akiandi ane iyo baolodjaka; mpeneyadiandi nda ditombya ina Ndjambi andi ale Nkolo ya lomo londa diiyo. Mpamba enda lomo loiko eyadi elandi, ko andi yeyaka dikaya baeki banandi lomo inda iyo diyulama landi na ngedingedi enda ditombya.
Baeki baolena banto aphe wemi landi nda ditombya diko, Mose la Eliya. Lomo londiyo na motshi oshilaki elengelengi. Eliya okolamaki nda pusupusu enda tsha, aye Ndjadiako ando mele okundaki Mose (Phalaka 2 Bankumu 2, la Eophwelo enda Dingembe 34:6). Sheleko eki bele beiko bephe wenamaka landi ndokoto na ? Djoi inda ditekya mbo; Anenamalomi Nkumu Yesu nda ditombya dinandi, andi aphongenama nko mele; banto banandi baokenamalomi la Nkumu endiyo; nkula baiko bawaki elengi, nkula baiko baokokolama landi ma motshi nda wina boyakalomiandi inda diyokola ekelizia enandi.
Isho yeyaka mbo; Bele enephe, Mose la Eliya, baophulula la Nkumu. Djoi inkono ikiyo aphululaka iyo landi ? Mako aphotosangele, aye Luka aotosangela mbo; «Iyo baotephela landi djoi inda bewedi onandi bokiandi wasaka diwa nda Yelushalema». Ko, tophwe mbo; Sosolo andi oki la djoi inda ditowela, aye mokongo bonda bewedi bonandi wina onda ditombya bokoyela, la Nkumu olangaki baeki banandi dikophola djoi diko.
Akiyo wenaka ngedingedi enda ditombya Petero osangelaki Nkumu mbo; Wekyi, oyadi bolotshi isho yulama ane; bolotshi isho toshumye tolombe tosato, imodi djoi indawe, imodi djoi ina Mose, la inkina djoi inda Eliya. Sosolo aki bolotshi iyo diyala nda bokoto, aye lakolotshi iyo disanganya Nkumu la benkambi ene shiko. Bolotshi isho baumela yeya mbo; Yesu Kilisto ayadi NDOSO ONDA BAUMELA. Paulu okotaki ele basi Kolosai mbo: «Andi ale BOTSHA onda djongi, ayawe, ekelizia; andi ale ANGOLELO, NSOMI matei banda bawaki, inandi diyala letetenyi enda BOSO». Shene Petero aolunga nda isanga djoi ine. Sheko dilenga ina ngedingedi ikitelaka, indakukaki, ko iyo andokaki lolaka matei anda dilenga asanga djoi ine mbo; «One ayadi Bononami olangemi; lookodyaka» (v.7). Ko aki dilenga dina ngedingedi alekaka, iyaolena phe nko Yesu andi mele. Nkumu Ndjei dilangaka isho yena phe nkOna bonandi, Yesu. Lako bonkina boyadi ndiyedi inandi; andi ale ndadiko anda bauma, ndosonda bankina bya, la Apha dilangaka isho yophika la yoyela la yokodyaka nkandi.
Mokongo bonda djoi diko, baeki ane akyakephaki, ko ankina baphe batshwaki, aotshikala phe nko Yesu. Tophwe lolaka lone mbo; PHE NKO YESU. Diyadi diisho yeya mbo; Ndaisho bana Nkumu Ndjei, BONTO OPHOKO ontulu oleko, Bononandi Yesu Kilisto, landi dilangaka o la isho diyala landi ndetema bendiso shene.
Ko aki Yesu la baeki ane basato akitelaka ma bokoto, andi ondakekemyaki ayandi; «Lotosangelaki nkulonto djoi ikinyo wenaka elengi ndi andetshwalomi Bonononto mewedi». Sheleko ekiandi alangaka iyo yumba baoi ane banda sosolo lako disangelankina ? Djoi inda basi Yuda baoshila yoka djoi inandi, baoshila yotona. Nkumu Ndjei ondakaaki djowa indolotshi inda iyo yimedya, ko iyo batolanga yimedya. Shene, Nkumu atolanga baeki yasangela baoi bakiyo wenaka nda bokoto bonda ditombya. Ko baeki baolumba baoi ane banda diphepha ndetema bendiyo elengi. Petero aotosangela djoi indako nonkanda bonandi bondoso. «Djoi inda isho totoyela besako ma mpima enanto akiso alosangelaka mpamba enda eyelo ena Nkumu endiso Yesu Kilisto, aye isho toki baenyi banda ditombya dinandi laisho. Djoi inandi aolamba lophiko la ditombya mele Nkumu Ndjei, Ishe endiso, aki djoi ayakaka elandi ma Ditombya diko inda bolotshi bolekola, mbo; Bona bonami one ondokemi lolango; andi aonshashadya».
Nkumu Yesu ondakekemyaki ayandi; Lotosangelaki onto baoi bakinyo wenaka elengi ndi andetshwalomi Bonononto ma bewedi. Ko baeki aiko basato baolambya baoi baiko ndetema bendiyo aye iyo lako dikophodya djoi inda yetshwa mewedi, la iyo baoluwulana mbo; Yetshwa mewedi ene eyadi no ? Ko iyo baoshila yena baoi baoi basato banda yetshwa mewedi; bona bonomoto, bonda dwele bonda wadi oki bodwo na Nayina, o la Lasalo. Sheleko ekiyo batophokwa djoi ine ? Isho yeyaka mbo; Baeki batolimbitela baoi phala elengi ndi wina oyulama Nyuma ndetema endiyo, bonto lonto. O la isho toshila yamba bokakaya bona Nyuma. Timedye andi ditotana laoi ane banda diphepha.
Rédigé en langue Ikela, par J. Barnes (Kitoko).