MUKANDA YA NTETE YA POLO NA BA TESALONIKA

 

Kapu 1 — Kapu 2 — Kapu 3 — Kapu 4 — Kapu 5

 

1        KAPU 1

1 Polo, ti Silvano[1], ti Timoteo[2], na dibundu ya ba Tesalonika[3], kati na Nzambi Tata ye kati na Mfumu Yezu Klistu : Dienga ti ngemba na beno.

2 Beto ke tonda Nzambi ntangu yonso sambu na beno yonso, na kutangaka beno na bisambu na beto, 3 na kuyindulaka ntangu yonso kisalu na beno ya lukwikilu, kisalu na beno ya ngolo ya zola, ti kukanga ntima na beno ya kivuvu ya Mfumu na beto Yezu Klistu, na ntwala ya Nzambi na beto ye Tata, 4 na kuzabaka, ba mpangi ya zolama na Nzambi, kusolama na beno. 5 Sambu nsangu ya mbote na beto kwisaka ve na beno kaka na ndinga, kansi mpi na ngolo, ye na Mpeve Santu, ye na kufuluka ya nene ya kundimisama, bonso beno kuzaba inki mutindu beto vandaka kati na beno sambu na beno. 6 Ye beno kumaka bilandi ba mbandu na beto ye ya Mfumu, ya beno yambaka ndinga, ti ba mpasi mingi, ti kiese ya Mpeve Santu ; 7 na mpila nde beno kumaka ba mbandu sambu na ba yina yonso ke kwikila na Masedonia ti na Akaya[4]. 8 Sambu ndinga ya Mfumu wakanaka katuka na beno, kaka ve na kati ya Masedonia ye na kati ya Akaya, kansi, na bisika yonso, lukwikilu na beno na Nzambi me mwanganaka, na mpila nde beto ikele na mfunu ve na kutubila yo. 9 Sambu bo mosi ke kutuba sambu na beto inki kukota beto vandaka na yo mfinama na beno, ye inki mutindu beno balukaka na Nzambi katuka na biteki, sambu na kusadila[5] Nzambi ya moyo ye ya kieleka, 10 ye sambu na kukinga katuka na mazulu Mwana na yandi yina yandi futumunaka kati na ba fwa, Yezu, yina ke gulusa beto na makasi ya ikele kwisa.

 

2        KAPU 2

1 Sambu beno mosi beno zaba, ba mpangi, nde kukota na beto kati na beno vandaka ya mpamba ve ; 2 kansi, na nima ya kumona ntete mpasi ye kusafulama na Filipi[6], bonso beno kuzaba yo, beto bakaka kikesa yonso kati na Nzambi na beto sambu na kumwangila beno nsangu ya mbote ya Nzambi na kati ya ba mvita ya nene[7]. 3 Sambu kupesa kikesa na beto vandaka na nzila ya kukusa ve, ata mvindu ve, ye [beto sadilaka] mayele ya mbi ve ; 4 kansi bonso beto ndimamaka na Nzambi sambu nde nsangu ya mbote kupesamina beto, beto ke kutuba mutindu yai, bonso na kusepidisa bantu ve, kansi Nzambi yina ke mekaka ba ntima na beto. 5 Sambu mpi beto sadilaka ve ndinga ya kuleba, bonso beno kuzaba yo, ata mambu yina ke kubumba nzala ya kuvwa konso kima[8], Nzambi ikele mbangi[9] na yo ; 6 ye beto sosaka ve nkembo yina ke katuka na bantu, ata kukatuka na beno ve, ata kukatuka na ba nkaka ve, ntangu beto lendaka kuvanda kizitu sambu na [beno] bonso ba ntumwa ya Klistu ; 7 kansi beto vandaka ntima mpima na kati na beno. Bonso nketo ke sansaka mbote—mbote bana na yandi mosi, 8 mutindu yina, na kuzolaka beno mingi, beto yilamaka na kutuba na beno kaka nsangu ya mbote ya Nzambi ve, kansi mpi luzingu na beto mosi, sambu beno me kuma bantu ya beto ke zolaka mingi. 9 Sambu beno ke yindula, ba mpangi, kulemba na beto ye kisalu na beto ya mpasi ; ikele na kusalaka mpipa ti mwini sambu na kupesa ve muntu mosi kati na beno kizitu, nde beto longaka beno nsangu ya mbote ya Nzambi. 10 Beno mosi, beno ikele ba mbangi[10], ti Nzambi mpi, nde beto tambulaka na busantu, ti na masonga, ti na kukonda kifu na ntwala na beno yina ke kwikila, 11 bonso beno kuzaba inki mutindu [beto bombaka] konso muntu na beno, bonso tata bana na yandi mosi, na kupesaka beno kikesa, ye na kubombaka beno, ye na kutaka kimbangi, 12 sambu nde beno kutambula na mutindu ya kufwana na Nzambi yina[11] ke kubinga beno na kimfumu na Yandi mosi ye na nkembo na Yandi mosi. 13 Ye yo yina mpi beto, beto ke kutonda Nzambi ya kukonda kuyambula na yai nde, ya beno yambaka na beto ndinga yina beto longaka [yina ikele] ya Nzambi, beno ndimaka, ndinga ya bantu ve, kansi (bonso yo ikele ya kieleka) ndinga ya Nzambi, yina mpi ke kusala kati na beno yina ke kwikila. 14 Sambu beno, ba mpangi, beno kumaka bilandi mbandu ya mabundu ya Nzambi yina ikele na Yudea kati na Klistu Yezu ; sambu beno mpi, beno monaka mpasi katuka na bantu ya dikanda na beno mosi mambu ya mutindu mosi ya bo mpi [monaka] mpasi katuka na ba Yuda, 15 ba yina kufwaka Mfumu Yezu ti ba profeta, ye ba yina kulaka beto na kuniokulaka beto, ye ba yina ke sepidisa Nzambi ve ye yina ikele ba mbeni ya bantu yonso, 16 —na kukangaka beto nzila ya kutuba na makanda na mpila nde bo kuguluka, sambu na kufulusa ntangu yonso kitesolo ya masumu na bo ; kansi makasi me bwila bo na nsuka.

17 Sambu na beto, ba mpangi, ya beto kabanaka ti beno na mwa ntangu na ilungi ye na ntima ve, beto sosaka ngolo, ti mpusa ya ngolo, kumona ilungi na beno ; 18 yo yina beto zolaka kwisa na beno, mono[12] Polo, ye mbala mosi ye mbala zole, ye satana kangaka beto nzila. 19 Sambu inki ikele kivuvu na beto, to kiese na beto, to mpu ya lukumu ya beto ke kudikembisa ? Keti ikele beno ve na ntwala ya Mfumu na beto Yezu, na kukwisa na Yandi ? 20 Sambu beno, beno ikele nkembo na beto ye kiese na beto.

 

3        KAPU 3

1 Yo yina, na kulendaka kukanga diaka ntima ve, beto monaka mbote na kubikala beto mosi na Atene[13], 2 ye beto tindaka Timoteo, mpangi na beto ye nduku ya kisalu ti Nzambi na nsangu ya mbote ya Klistu, sambu na kusikidisa beno ti kupesa beno kikesa[14] na yina me kutala lukwikilu na beno, 3 na mpila nde mosi ve kuyangisama na ba mpasi yayi ; sambu beno kuzaba beno mosi nde beto ikele pana sambu na yo. 4 Sambu mpi, ntangu beto vandaka mfinama na beno, beto tubaka na beno na ntwala nde beto fetele kumona mpasi, bonso mpi yo kumaka, ye bonso beno kuzaba yo. 5 Yo yina mono mpi, na kulendaka kukanga diaka ntima ve, mono tindaka na mpila nde mono kuzaba [inki mutindu] lukwikilu na beno ikele, mbayi—mbayi mpukumuni kupukumuna beno, ye nde kisalu na beto kukuma mpamba. 6 Kansi Timoteo na kukumaka mfinama na beto katuka na beno, ye ya yandi natilaka beto ba nsangu ya mbote ya lukwikilu na beno ti ya zola na beno, [ye ya yandi tubilaka beto] nde beno ikele kuyindula beto ntangu yonso na mbote, na kuvandaka na mpusa ya ngolo ya kumona beto, bonso beto mpi ke zola kumona beno ; 7 —yo yina, ba mpangi, beto bombamaka na yina me kutala beno na nzila ya lukwikilu na beno, na ba mpasi na beto yonso ti na kuniokulama na beto ; 8 sambu ntangu yayi beto ke kuzinga, kana beno ke kutelama ngwi kati na Mfumu. 9 Sambu inki matondo beto lenda kupesa Nzambi sambu na beno, sambu na kiese yonso yina beto ke kuyangalala ti yo sambu na beno na ntwala ya Nzambi na beto, 10 na kusambaka mpipa ti mwini na kukwamina kibeni, sambu nde beto kumona ilungi na beno ye nde beto kuyika yina me kukonda na lukwikilu na beno ! 11 Nde Nzambi na beto ye Tata yandi mosi, ti Mfumu na beto Yezu, kutwadisila beto nzila mfinama na beno ; 12 ye na yina me kutala beno, nde Mfumu kufulusa beno ye kufulusa beno mingi kati na zola ba mosi na ba ya nkaka ti na bantu yonso, bonso beto mpi sambu na beno, 13 sambu na kusikidisa ba ntima na beno ya konda kifu na busantu na ntwala ya Nzambi na beto ye Tata na kwisa ya Mfumu na beto Yezu ti ba santu na yandi yonso.

 

4        KAPU 4

1 Ya nkaka mpi, ba mpangi, beto ke bondila beno ye beto ke kupesa beno kikesa na nzila ya Mfumu Yezu, sambu nde, bonso beno bakaka na beto inki mutindu beno fetele kutambula ti kusepidisa Nzambi, bonso mpi beno ke tambula, beno fuluka na yo ya kuluta. 2 Sambu beno kuzaba inki ba lutumu beto pesaka beno na nzila ya Mfumu Yezu. 3 Sambu yo yayi luzolo ya Nzambi, busantu na beno, nde beno kubuya pite, 4 nde konso muntu na kati na beno kuzaba kuvwa nitu na yandi mosi na busantu ti na lukumu, 5 na ba mpusa ya mbi ya kulula bonso mpi ke salaka makanda ba yina kuzaba Nzambi ve ; 6 muntu mosi lenda kukusa mpangi na yandi ve to kusala yandi mbi na diambu, sambu Mfumu ikele muvutudi mbela na mambu yayi yonso, bonso mpi beto songaka beno yo na ntwala ti kuta kimbangi. 7 Sambu Nzambi bingaka beto ve na mvindu kansi na busantu. 8 Yo yina yina ke kulosa [yo], yandi ke kulosa muntu ve, kansi Nzambi, yina pesaka beno mpi Mpeve Santu na Yandi.

9 Na yina me kutala zola ya kimpangi, beno ikele na mfunu ve nde mono kusonikila beno yo ; sambu beno mosi, beno me longamaka na Nzambi na kuzolana mosi na ya nkaka ; 10 sambu mpi beno ke salaka yo na ba mpangi yonso yina ikele na Masedonia ya mvimba ; kansi beto ke kupesa beno kikesa, ba mpangi na kufuluka na yo ya kuluta, 11 ye beno kutula ngolo na kuzinga na ngemba, na kusala mambu na beno mosi ye na kusala na maboko na beno mosi, bonso beto tumaka yo na beno, 12 na mpila nde beno tambula na lukumu na ba yina ya nganda ye beno kuvanda ve na mfunu ya muntu[15].

13 Beto zola ve, ba mpangi, nde beno kukonda kuzaba na yina me kutadila ba yina me kulala[16], na mpila nde beno kuvanda ve na mawa bonso ba ya nkaka yina me konda kivuvu. 14 Sambu kana beto ke kwikila nde Yezu ku fwaka, ye nde yandi futumukaka, mutindu mosi mpi, ti yandi, Nzambi ta kunata ba yina me lalaka na nzila ya Yezu 15 (sambu beto ke tubila beno mambu yayi na nzila ya ndinga ya Mfumu : Nde beto, ba zinga, ba yina ta kuzinga tii na kukwisa ya Mfumu, beto ta kuyita na ntwala ata fioti ve ba yina me lalaka. 16 Sambu Mfumu yandi mosi, ti kuboka ya lutumu[17] ti mbuta ya ba wanzio, ti mpungi[18] ya Nzambi, ta kulumuka katuka na zulu ; ba fwa kati na Klistu ta kufutumuka ntete—ntete ; 17 na nima beto, ba zinga yina ke kuzinga beto ta kunatama kimvuka ti bo kati na matuti na kukutana ti Mfumu, na mupepe ; ye mutindu yina beto ta kuvanda ntangu yonso ti Mfumu. 18 Beno bombasana[19] mosi na ya nkaka na ba ndinga yayi).

 

5        KAPU 5

1 Kansi na yina me kutala ba ntangu ti ba nsungi, ba mpangi, beno ikele na mfunu ve nde bo kusonikila beno yo ; 2 sambu beno kuzaba beno mosi mbote—mbote nde kilumbu ya Mfumu ta kukwisa bonso muyibi na kati ya mpipa. 3 Ntangu bo ta kutuba : « Ngemba ti kukebama ya mbote», ibuna kubebisama ya kintulumukina ta bwila bo, bonso ba mpasi [ke bwilaka] nketo yina ikele na divumu, ye bo ta kutina ata fioti ve.

4 Kansi beno, ba mpangi, beno ikele na kati ya mudidi ve, na mpila nde kilumbu kubwila beno bonso muyibi ; 5 sambu beno ikele beno yonso bana ya nsemo ti bana ya mwini ; beto ikele ya mpipa ata ya mudidi ve. 6 Yo yina mpi beto kulala ve bonso ba ya nkaka, kansi beto kangula meso ye beto konda kulutisa kiteso ; 7 sambu ba yina ke lalaka, bo ke lalaka na mpipa, ye ba yina ke kulawuka malafu, bo ke kulawukaka malafu na mpipa ; 8 kansi beto yina ikele ya mwini, beto lutisa kiteso ve, na kulwataka nkaku² ya ntulu[20] ya lukwikilu ye ya zola, ye, bonso nkaku[21] ya ntu, kivuvu ya luguluku[22] ; 9 sambu Nzambi yidikaka beto sambu na makasi ve, kansi na kubaka luguluku na nzila ya Mfumu na beto Yezu Klistu, 10 yina fwaka sambu na beto, na mpila nde, ata beto lenda kangula meso, ata beto lenda kulala[23], beto ke kuzinga kimvuka ti Yandi. 11 Yo yina beno pesana kikesa³ mosi na ya nkaka ye kutungana mosi na ya nkaka, bonso mpi beno ke kusala yo.

12 Beto ke bondila beno, ba mpangi, na kuzaba ba yina ke kusala kisalu kati na beno, ye yina ke twadisa[24] beno kati na Mfumu, ye bo ke kukebisa beno, 13 ye na kubakaka bo na lukumu mingi na zola sambu na kisalu na bo. Beno kuvanda na ngemba kati na beno. 14 Beto ke kupesa beno kikesa, ba mpangi : Beno kebisa ba mvwanzi, beno kubomba ba yina me vidisa kikesa, beno sadisa ba yina ikele ya kulemba, beno vanda na ntima ya nda na bantu yonso. 15 Beno keba nde muntu mosi ve kuvutula mbi na mbi ; kansi beno landa ntangu yonso yina ikele mbote, ye kati na beno, ye na yina me kutala bantu yonso. 16 Beno yangalala ntangu yonso. 17 Beno kusamba na kukonda kuyambula. 18 Na mambu yonso beno vutula matondo, sambu yina ikele luzolo ya Nzambi kati na Klistu Yezu sambu na beno. 19 Beno kuzima Mpeve ve ; 20 beno sawula ve mbikudulu[25], 21 kansi beno meka mambu yonso ; beno simba yina ikele mbote. 22 Beno vanda ntama na mambu yonso ya mbi.

23 Nzambi ya ngemba yandi mosi kusantisa[26] beno ya mvimba ; ye nde mpeve na beno, ye moyo na beno, ye nitu na beno ya mvimba, kuvanda ya kubumbama na konda kunganina na kukwisa ya Mfumu na beto Yezu Klistu. 24 Yina ke kubinga beno ikele Nkwikisi, yina mpi ta kusala yo.

25 Ba mpangi, beno samba sambu na beto. 26 Beno pesa ba mpangi yonso mbote na beze ya santu. 27 Mono ke kulomba beno ngolo na nzila ya Mfumu nde mukanda kutangama na ba mpangi yonso ya santu. 28 Bika nde dienga ya Mfumu na beto Yezu Klistu kuvanda na beno !