MOKANDA NA PAULO NA MIBALE EKOMELAKI YE
| 1 |
Mbɔtε na ngai Paulo, Ntoma na Masiya Yesu mpɔ na mokano na Njambe ete násakola Nsango Malamu na bomɔi bojali kati na Masiya Yesu, na yɔ Timɔtε, mwana na ngai na bolingo. 2 Ngɔlu, na mawa, na kimia, kouta na Njambe Tata, na Masiya Yesu Nkolo na biso, éjala na yɔ.
3 Nayokeli Njambe eboto, (nakosalelaka ye na lisɔsɔli mpεtɔ, lokola esalaki bankɔkɔ), wana ekokanisa ngai yɔ na bisεngεli na ngai butu na moi, lokola ekosalaka ngai ntango yɔsɔ. 4 Awa, ekokanisaka ngai mpisoli na yɔ, mposa ejali na ngai mingi na komɔna yɔ, na ntina ete násepela na esεngɔ. 5 Nasili kojua ekaniseli na kondima na yɔ na sɔlɔ, oyo ejalaki na nkɔkɔ na yɔ mwasi Loidi liboso, mpe na mama na yɔ Yunike na nsima; oyo mpe nasili kondimisama ete ejali kati na yɔ.
6 Na ntina yango najali kokanisela yɔ ete ópelisa mɔtɔ na likabo na Njambe lijali kati na yɔ mpɔ na kotia na mabɔkɔ na ngai. 7 Mpɔ ete Njambe apεsi biso molimo na kɔikɔi tε, kasi molimo na nguya mpe na bolingo mpe na makanisi malamu. 8 Na bongo óyoka nsɔni na ntina na matatoli na Nkolo tε, na ntina na ngai mokangami na ye mpe tε, kasi óyokana mpasi mpɔ na Nsango Malamu na ngai elɔngɔ, pelamɔkɔ Njambe akopεsa nguya. 9 Ye Njambe abikisi biso, abiangi biso na ebiangeli na bulε, na motindo na misala na biso tε, kasi na motindo na mokano na ye mɔkɔ na liboso, na ngɔlu epεsεmεli biso kati na Masiya Yesu na liboso, naino ejalaki ntango tε. 10 Ngɔlu yango esili kobima polele sasaipi mpɔ na komɔnana na Mobikisi na biso Masiya Yesu, oyo asilisi kufa mpe abimisi bomɔi, na ejangeli na kopɔla, kati na moi mpɔ na Nsango Malamu. 11 Ngai natiami mosakoli na Nsango Malamu yango, na Ntoma, na Molakisi. 12 Na ntina yango najali koyoka mpasi na makambo oyo, kasi najali koyoka nsɔni tε. Mpɔ ete nayebi oyo nasili kondimela, mpe nandimisami ete akoki kobatela yango etii ngai na mabɔkɔ na ye kino Mokɔlɔ yango.
13 Ójua mwango na makambo malamu masili yɔ koyoka na monɔkɔ na ngai, kati na kondima, na bolingo, na Masiya Yesu. 14 Mpɔ na Molimo Mosanto oyo akojalaka kati na biso, óbatela elɔkɔ yango malamu esili kotiama na mabɔkɔ na yɔ.
15 Oyebi ete bato yɔsɔ kati na Asia bapεngwεli ngai; kati na bango Fugεlε na Elεmɔkεnε. 16 Nkolo áyokela ndako na Onesifɔlɔ mawa, mpɔ ete mbala mingi ayikisaki ngai mpiko mpe ayokaki nsɔni na ntina na minyɔlɔlɔ na ngai tε; 17 kasi wana ejalaki ye na Loma alukaki ngai na etingia mpe ajuaki ngai. 18 Nkolo ápεsa ye njela na kojua mawa mboka na Nkolo na Mokɔlɔ yango. Yɔ mɔkɔ oyebi na malamu makambo yɔsɔ masalelaki ye ngai na Ɛfεsε.
Toli mpɔ na Timɔtε
| 2 |
Na bongo mpɔ na yɔ, mwana na ngai, ókemba na ngɔlu ejali kati na Masiya Yesu. 2 Mpɔ na makambo mayoki yɔ na monɔkɔ na ngai na miso na matatoli mingi, ópεsa yango na mabɔkɔ na bato na sembo, baoyo bakobɔnga mpɔ na kolakisa bamosusu. 3 Ósangana na ngai na koyoka mpasi lokola mobuni malamu na Masiya Yesu. 4 Moto oyo ajali kobuna akomibulunganisaka na makambo na bomɔi oyo tε, ete ásepelisa mobunisi na ye. 5 Sɔkɔ moto akobuna na masano akojua motole bobεlε sɔkɔ akobuna na motindo mokoki. 6 Ekoki ete motimoli oyo asali mosala ájua likabo na mbuma liboso. 7 Ókanisaka yango ejali ngai koloba, mpɔ ete Nkolo akopεsa yɔ mayεlε na koyeba makambo yɔsɔ ntina.
8 Óbosanaka tε ete Yesu Masiya asili kosekwa na bakufi, ye moto na libota na Dawidi, lokola ejali kati na Nsango Malamu na ngai. 9 Mpɔ na Nsango Malamu yango najali kojua mpasi, εε mpasi na minyɔtɔ, lokola moto na makambo mabe ; kasi Maloba na Njambe masili kokangama tε. Yango wana najali koyikela makambo yɔsɔ mpiko mpɔ na Bapɔnami; 10 na ntina ete bango mpe bájua lobiko lojali kati na Masiya Yesu, na nkεmbɔ na seko ntango mɔkɔ. 11 Oyo likambo na sembo: Sɔkɔ tokufaki na ye esika mɔkɔ, tokojua bomɔi na ye esika mɔkɔ. 12 Sɔkɔ tokoyika mpiko, tokojala mikonji na ye esika mɔkɔ. 13 Sɔkɔ tokoangana ye, ye mpe akoangana biso. Sɔkɔ tokotika kondima, ye akoumela sembo, akoki komiangana tε.
14 Ókanisela bato makambo oyo, kolakaka bango makasi na miso na Njambe ete bábunaka na maloba tε, mpɔ etumba na maloba ekosunga lisungi tε, nde ekobebisa bayoki na yango. 15 Ótia makasi mpɔ na komisembola na miso na Njambe, mosali oyo abɔngi, oyo akoyoka nsɔni tε nde akosembola maloba na sɔlɔ. 16 Ópεngwεla bilobaloba na mpamba, mpɔ ete bato na yango bakoleka na kotiola Njambe, 17 mpe maloba na bango makolia lokola mpota. 18 Umεnai na Filete bajali bongo, baoyo bapεngwi na makambo na sɔlɔ, kolobaka ete lisekwa esili kokoma, babebisi mpe kondima na bamosusu.
19 Moboko makasi na Njambe ekangami ngwi, ejali na Likomi ete:
Yawe ayebi bato na ye.
Mpe ete:
Batangi na nkombo na Yawe bátangwa na bokεsεnε.
20 Na ndako monεnε bilɔkɔ bijali bobεlε na wɔlɔ na palata tε, kasi na mabaya mpe na mbεlε ; mosusu mpɔ na misala kitɔkɔ, mosusu mpɔ na misala mpamba. 21 Na bongo sɔkɔ moto mɔkɔ akomipεtɔla na makambo yango, akojala elɔkɔ mpɔ na misala kitɔkɔ, esili kobulama, mpe kobɔnga mpɔ na Nkolo, mpe koselingwa na misala malamu yɔsɔ.
22 Nde ókimaka mposa na bolεngε, óbenganaka boyεngεbεnε na kondima, na bolingo, na kimia, esika mɔkɔ na baoyo bako- biangaka nkombo na Nkolo kati na mitema mpεtɔ. 23 Ópεngwaka na ntembe na bolema na bato bayekoli makambo tε, mpɔ oyebi ete ikoyeisa koswana. 24 Nde ekoki ete moombo na Nkolo áswanaka tε, kasi ájala na kimia kati na bato yɔsɔ, molakisi na mayεlε, moto na koyikela makambo mabe mpiko. 25 Alakisa batεmεli na ye na bopɔlɔ, ete mbele Njambe akopεsa bango kobongola na motema, ntina ete báyeba makambo na sɔlɔ, 26 básembwa lisusu mpɔ na kobima na motambo na Satana, ata sasaipi basili kokangama na ye ete básala mokana na ye.
| 3 |
Nde óyeba boye, ete na mikɔlɔ na nsuka ntango makasi ikoya. 2 Mpɔ ete bato bakojala balingi na njoto na bango mpenja, balingì na misɔlɔ, bamikumisi, balolεndɔ, batuki. Bakojala batioli na baboti, bajangi na eboto, bato na bosɔtɔ, 3 bajangi na boboto, bajangi na mawa, batɔngi, bato bayebi kokanga mitema tε, bangali, bayini na makambo malamu, 4 basεngεnyi, bato na wayawaya, bato babimbi na ngambó, balingi na makambo na esεngɔ nde balingi na Njambe tε. 5 Bakojala na lolenge na bijaleli na bato na Njambe nde bakoboya nguya na yango. Ópεngwaka na baoyo mpe. 6 Mpɔ ete bato bajali na kati na bango, baoyo bakokɔtaka na ndako, bakokangaka bilema basi baoyo basili kojua mokumba na masumu mpe bakokambamaka na mposa na mitindo mingi ; 7 basi yango bakoyekolaka ntango yɔsɔ, nde bakokokaka kokoma koyeba makambo-na-sɔlɔ ntina sɔkɔ mokε tε. 8 Pelamɔkɔ Yane na Yambele batεmεlaki Mose, bobεlε bongo mpe baoyo bakotεmεlaka makambo-na-sɔlɔ, mpɔ bajali baoyo basili kobeba na makanisi na bango, mpe na ntina na bindimeli babɔngi tε. 9 Kasi bakotambolaka lisusu tε, mpɔ ete bolema na bango ekojala polele na bato yɔsɔ, lokola bolema na mibali yango mibale.
10 Nde mpɔ na yɔ, óbilaka pεnεpεnε na mateyo na ngai, na bijaleli na ngai, na mwango na ngai, na kondima na ngai, na motema na ngai pεtεε, na bolingo na ngai, na mpiko na ngai, 11 na minyɔkɔ na mpasi na ngai mibimela ngai na Antiɔkia, na Ikɔni, na Lusutula. Oyebi motindo na minyɔkɔ mijuaki ngai, mpe ete Nkolo abikisaki ngai kati na yango yɔsɔ. 12 Ɛε, bato yɔsɔ baoyo bajali na mposa na bijaleli na bato na Njambe kati na Yesu Masiya, bakonyɔkɔlama. 13 Nde bato mabe, na bakosi, bakoleka na mabe, bakojimbisa mpe bakojimbisama.
14 Nde yɔ óumela kati na makambo mayekoli yɔ mpe mandimisami yɔ, mpɔ oyebi sɔkɔ oyekolaki yango na monɔkɔ na banani. 15 Oyebi mpe ete longwa na bomwana, osili koyeba Makomi na Njambe makoki na kopεsa yɔ mayεlε mpɔ na lobiko na njela na kondimela Masiya Yesu. 16 Makomi yɔsɔ mapemami na mpema na Njambe mpe makoki mpɔ na mateyo, mpɔ na kopamela, mpɔ na kosembola, mpɔ na kolakisa boyεngεbεnε, 17 na ntina ete moto na Njambe ákoka nyε ye mɔkɔ mpe mpɔ na misala malamu yɔsɔ.
| 4 |
Najali kolaka yɔ na miso na Njambe mpe na miso na Masiya Yesu oyo alingi kosambisa bato na bomɔi na bakufi, nakolaka yɔ mpe na Komɔnana na ye, na Bokonji na ye: 2 Ósakola Maloba na Njambe, óselingwa na bilaka malamu mpe na bilaka malamu tε. Ólimbola ntina, ópamela, ópεsa toli, na motema pεtεε na kolakisa. 3 Mpɔ ete elaka ekoya wana ekoyikela bango mateyo malamu mpiko tε, kasi mpɔ na konyɔmitisa matoi na bango, bakomijuela ebele na milakisi pelamɔkɔ ejali bango mpenja na mposa; 4 bakopεngwa na koyoka makambo-na-sɔlɔ, bakobongwa koyoka misapo na mpamba. 5 Nde yɔ ómisεnjεla na makambo yɔsɔ, ókanga motema kati na mpasi, ósala mosala na mosakoli na Nsango Malamu, ókokisa lotomo na yɔ nyε.
6 Mpɔ na ngai, najali naino kosopana lokola mbεka, mpe elaka na kolongwa na ngai esili kobεlεma. 7 Nasili kobuna etumba malamu, nasilisi njela na kotambola, nasili kobatela Bindimeli. 8 Longwa sasaipi motole na boyεngεbεnε ebombameli ngai, oyo Nkolo, Mosambisi na sembo, akopεsa ngai na Mokɔlɔ yango, nde bobεlε ngai tε kasi bango yɔsɔ basili kolinga Komɔnana na ye.
Maloba na Nsuka
9 Ótia motema makasi mpɔ na kokoma awa na ngai nɔki. 10 Mpɔ ete Dema atiki ngai, mpɔ alingi ekeke oyo, mpe akei na Tεsalɔniki. Keleseke akei na Galatia, Tito akei na Dalamatia. 11 Bobεlε Luka ajali na ngai elɔngɔ. Kamata Malako, mpe wana ekoya yɔ, kamba ye mpɔ akojala mpɔ na lisungi malamu na lotomo na ngai. 12 Natindaki Tukiki kuna na Ɛfεsε. 13 Wana ekoya yɔ, nata mokoto motikaka ngai na Toloa na ndako na Kalapa, nata mpe mikanda, kasi nata mposo na kokoma liboso na yɔsɔ.
14 Alεsandala, mosali na bibende, abimisi likunya mingi epai na ngai. Tika ete Nkolo ápεsa ye libonja na misala na ye. 15 Yɔ mpe ókeba na ye, mpɔ ete atεmεli mateyo na biso mingi mpenja.
16 Na kosamba na ngai na liboso moto tε ajalaki epai na ngai, kasi bato yɔsɔ batiki ngai. Étangamela bango tε. 17 Nde Nkolo atεlεmaki epai na ngai mpe akembisaki ngai, na ntina ete na monɔkɔ na ngai Esakweli ésakolama mingi mpenja mpe Bapakano yɔsɔ báyoka yango; nabikisamaki mpe na monɔkɔ na nkɔsi. 18 Nkolo akobikisa ngai na misala mabe yɔsɔ mpe akokomisa ngai na malamu kati na Bokonji na ye na Likolo. Na ye nkεmbɔ libela na libela, bobεlε bongo.
19 Pεsa mbɔtε na Pisika, na Akula, na bato na ndako na Onesifɔlɔ. 20 Elasata aumelaki na Kɔlinti ; natikaki Tɔlɔfimi na Mileti na bokɔnɔ. 21 Ótia motema na koya liboso na mikɔlɔ na malili. Yubulu, na Pude, na Lini, na Kulaudia, na Bandeko yɔsɔ batindeli yɔ mbɔtε.
22 Nkolo ájala na molimo na yɔ. Ngɔlu éjala na bino.