MOKANDA NA PAULO EKOMELAKI YE
1 Mbɔtε na biso, Paulo mokangami na Masiya Yesu, na Timɔtε Ndeko na biso, na yɔ Filemona moninga na biso na mosala, molingami, 2 mpe na Apia Ndeko na biso mwasi, mpe na Alakipi moninga na biso na etumba, mpe na ekelesia ekoyanganaka na ndako na yɔ. 3 Ngɔlu, na kimia, kouta na Njambe Tata na biso mpe na Nkolo Yesu Masiya éjala na bino.
4 Nakotɔndaka Njambe na ngai ntango yɔsɔ, wana ekoloba ngai makambo na yɔ kati na mabɔndεli na ngai. 5 Nakoyokaka mpɔ na bolingo na kondima na yɔ ejali na yɔ mboka na Nkolo Yesu mpe na Babulami yɔsɔ lokola. 6 Nakobɔndεlaka ete, wana ekosangana kondima na yɔ, ésalaka na nguya mpɔ na koyeba makambo malamu yɔsɔ mpɔ na Masiya majali kati na biso. 7 Mpɔ ete nasili kojua esεngɔ mingi na libɔndi mingi na ntina na bolingo na yɔ, mpɔ ete mitema na Babulami misili kobɔndisama mpɔ na yɔ Ndeko.
8 Yango wana, ata nakokaki nde kolaka yɔ polele mpenja kati na Masiya, 9 kasi nakobɔndεla yɔ mpɔ na bolingo. Ata najali Paulo mobange, mpe sasaipi mokangami mpɔ na Masiya Yesu, 10 nde najali kobɔndεla yɔ na ntina na mwana na ngai, oyo naboti awa ejali ngai mokangami, ye Onesimi. 11 Ntango mosusu asungaki yɔ tε, nde sasaipi ajali mosungi na biso na yɔ. 12 Najali kojongisa ye na yɔ, ata ajali lokola
motema na ngai mɔkɔ. 13 Nalingaki kosimba ye awa na ngai, ete ásalela ngai mpɔ na yɔ, awa esili ngai kokangama mpɔ na Nsango Malamu. 14 Nde najali na mposa na kosala likambo mɔkɔ tε, sɔkɔ yɔ ondimi tε; na ntina ete boboto na yɔ ébima na makasi na moto mosusu tε, kasi na mposa na yɔ mɔkɔ. 15 Mpɔ ete mbele alongwaki na yɔ ntango mokε na ntina oyo, ete ójua ye seko; 16 nde lokola moombo tε kasi na motindo eleki moombo, lokola Ndeko molingami. Ajali molingami na ngai liboso, nde aleki kojala molingami na yɔ bobεlε mpɔ na ye mɔkɔ tε kasi mpɔ na Masiya. 17 Na bongo sɔkɔ okokanisa ngai lokola moninga, ónyangela ye lokola ngai.
18 Sɔkɔ asaleli yɔ mabe, sɔkɔ ajali na nyongo na yɔ, ótanga yango epai na ngai. 19 Ngai Paulo nakomi boye na lobɔkɔ na ngai, ngai nakofutela yɔ yɔsɔ. Nalingi koloba na yɔ tε ete ojali na nyongo na ngai mpɔ na bomɔi na yɔ mɔkɔ. 20 Ɛε Ndeko, tika nájua lisungi oyo na yɔ kati na Nkolo. Ókitisa motema na ngai kati na Masiya.
21 Nakomeli yɔ mokanda mpɔ nasili kondimisama ete okoyoka ngai, mpe nayebi ete okosala makambo malobi ngai. 22 Lisusu, óbɔngisela ngai esika na kofanda mokε, mpɔ ete najali na elikia ete nakopεsεmεla bino lisusu mpɔ na mabɔndεli na bino.
23 Epafala moninga na ngai na etumba kati na Masiya atindeli yɔ mbɔtε, 24 na Malako, na Alisitakala, na Dema, na Luka; bango baninga na ngai na mosala.